महाराष्ट्र राज्याच्या स्थापनेला ५० वर्षे पूर्ण झालेली असताना राज्याच्या क्रीडा व युवक कल्याण खात्याने युवा धोरण अद्यापपर्यंत जाहीर केलेले नाही. राज्याच्या एकूण लोकसंख्येच्या सुमारे निम्मी लोकसंख्या ही १३ ते ३५ वयोगटातील युवांची आहे व या मोठ्या प्रमाणावरील गटासंदर्भात शासनाच्या त्यांच्या विकासासंधार्भातील भूमिका स्पष्ट व्हायला हव्यात व ग्रामीण, शहरी, आदिवासी, दलित, अल्पसंख्याक युवांच्या विकासासंदर्भात शासनाने विशेष योजना राबविल्या पाहिजेत. या संदर्भातील पथदर्शी सूचनांचा अंतर्भाव युवा धोरणात असणे गरजेचे आहे. महाराष्ट्र राज्याचे युवा धोरण हे भविष्यकाळात युवांच्या विकासाबरोबरच राज्याच्या विकासासाठी देखील पूरक ठरेल.
राज्य युवा धोरणाने महाराष्ट्रातील सर्व स्तरांतील युवांना कर्तव्य व जबाबदार्‍यांचे भान देतानाच त्यांच्या आशा-आकांक्षा व गरजांना न्याय देणेही अभिप्रेत आहे.

- सुप्रिया सुळे, निमंत्रक, नवमहाराष्ट्र युवा अभियान

महाराष्ट्र राज्याच्या स्थापनेस ५० वर्षे पूर्ण होत असताना राज्याचे युवा धोरण जाहीर झालेले नव्हते. यास्तव यशवंतराव चव्हाण प्रतिष्ठान, मुंबई-नवमहाराष्ट्र युवा अभियानातर्फे मागील दोन वर्षांपासून महाराष्ट्र राज्य युवा धोरण जाहीरनामा उपक्रम निमंत्रक मा. सुप्रिया सुळे यांच्या नेतृत्वाखाली हाती घेतला आहे. मसुदा निश्चितीच्या प्रक्रियेसाठी अभियानातर्फे ड्राफ्ट कोअर टीमची स्थापना करण्यात आली. तसेच विविध विषयांसंदर्भात तज्ज्ञ मंडळींची ड्राफ्टिंग कमिटीही गठित करण्यात आली. या समितीमध्ये महाराष्ट्रातील ३० नामवंत विचारवंत, अभ्यासक, स्वयंसेवी संस्थांचे प्रतिनिधी यांचा समावेश होता.